ఆంధ్రప్రదేశ్ రాష్ట్ర నైపుణ్యాభివృద్ధి సంస్థ (APSSDC) ఆధ్వర్యంలో పల్నాడు జిల్లా మాచర్లలో మెగా జాబ్ డ్రైవ్ ఘనంగా నిర్వహించారు.
మాచర్లలోని కృష్ణవేణి జూనియర్ కళాశాల వేదికగా నిర్వహించిన ఈ జాబ్ మేళాలో 20 ప్రముఖ కంపెనీలు పాల్గొన్నాయి.
మొత్తం 187 మంది నిరుద్యోగ యువత హాజరుకాగా, వారిలో 68 మంది వివిధ కంపెనీల్లో ఉద్యోగాలకు ఎంపికయ్యారు.
ఈ విషయాన్ని పల్నాడు జిల్లా నైపుణ్యాభివృద్ధి అధికారి ఈ. తమ్మాజి రావు వెల్లడించారు.
ముఖ్య అతిథిగా గౌతంరెడ్డి
కార్యక్రమానికి మాచర్ల ఎమ్మెల్యే జూలకంటి బ్రహ్మానందరెడ్డి తనయుడు జూలకంటి గౌతంరెడ్డి ముఖ్య అతిథిగా హాజరయ్యారు.
మాచర్లలో ఇలాంటి మెగా జాబ్ మేళా నిర్వహించడం సంతోషకరమని ఆయన పేర్కొన్నారు.
ఉద్యోగం వచ్చిన వారు జీతం తక్కువ అని వెనక్కి తగ్గకుండా, జీవితం కోసం కష్టపడి పనిచేయాలని యువతకు సూచించారు.
ఒక కంపెనీలో అనుభవం, నైపుణ్యాన్ని పెంపొందించుకుని మరింత ఉన్నత అవకాశాలను అందిపుచ్చుకోవాలని సూచించారు.
ఉద్యోగాలు సాధించిన యువతకు అభినందనలు తెలియజేస్తూ, భవిష్యత్తులో మరిన్ని ఉన్నత శిఖరాలు అధిరోహించాలని ఆకాంక్షించారు.
ప్రముఖుల పాల్గొనడం
కార్యక్రమంలో ఎస్వీఆర్ డిగ్రీ కళాశాల, కృష్ణవేణి జూనియర్ కళాశాల ప్రిన్సిపాల్ వై. వెంకట రామయ్య, మాజీ మార్కెట్ యార్డ్ చైర్మన్ యాగంటి మల్లికార్జునరావు, మాచర్ల టౌన్ అధ్యక్షుడు కే. దుర్గారావు, అదనపు జిల్లా నైపుణ్యాభివృద్ధి అధికారి వి.సి.హెచ్. రామాంజనేయులు, జిల్లా కార్పొరేట్ రిలేషన్ ఆఫీసర్ ఆర్. కిరణ్ నాయక్, జిల్లా ఉద్యోగ కల్పన అధికారి ఎం. రవీంద్ర నాయక్, స్కిల్ డెవలప్మెంట్ సిబ్బంది, కంపెనీల హెచ్ఆర్ ప్రతినిధులు, కళాశాల సిబ్బంది తదితరులు పాల్గొన్నారు.
