మాచర్ల మున్సిపల్ కార్యాలయంలో ప్రజా ప్రతినిధుల కాలం ముగియడంతో పట్టణ పాలనలో కీలక మార్పులు చోటుచేసుకున్నాయి. ఈ నేపథ్యంలో ప్రభుత్వం గురజాల ఆర్డీవో మురళిని మాచర్ల మున్సిపాలిటీకి స్పెషల్ ఆఫీసర్గా నియమించడంతో పట్టణ అభివృద్ధిపై కొత్త ఆశలు చిగురిస్తున్నాయి.
ఈరోజు మాచర్ల మున్సిపల్ కార్యాలయానికి విచ్చేసిన స్పెషల్ ఆఫీసర్ మురళిని మాజీ మున్సిపల్ చైర్మన్ షేక్ మదర్ సాహెబ్, కమిషనర్ డి. వేణుబాబు, డాక్టర్ అఫ్జల్ బాషా తదితరులు సాదరంగా ఆహ్వానించారు. ఈ సందర్భంగా స్థానిక నాయకులు పట్టణ అభివృద్ధికి సమన్వయంతో పని చేయాల్సిన అవసరాన్ని ప్రస్తావించారు.
అనంతరం మున్సిపల్ కార్యాలయంలో అధికారులతో సమావేశం నిర్వహించిన మురళి, పట్టణ అభివృద్ధి, మౌలిక వసతుల మెరుగుదల, ప్రజలకు మెరుగైన సేవలు అందించే దిశగా చర్యలు తీసుకోవాలని అధికారులకు సూచించారు. ప్రజల ఆశలను నెరవేర్చే విధంగా పారదర్శకంగా పాలన కొనసాగుతుందని ఆయన పేర్కొన్నారు.
