📍 మాచర్ల:
పట్టణంలోని రూప్లైన్ కాలనీ, 8వ వార్డులో మాచర్ల రూరల్ సీఐ ఆధ్వర్యంలో పోలీసులు కార్డన్ అండ్ సెర్చ్ ఆపరేషన్ నిర్వహించారు. ఈ ప్రత్యేక తనిఖీల్లో అనుమానాస్పదంగా ఉన్న వాహనాలు, వస్తువులను పరిశీలించారు.
ఈ సందర్భంగా మొత్తం 33 బైకులు, రెండు ఆటోలుతో పాటు గడ్డపారలు, గొడ్డళ్లు వంటి పరికరాలను పోలీసులు స్వాధీనం చేసుకున్నారు. చట్ట విరుద్ధ కార్యకలాపాలకు ఉపయోగించే అవకాశం ఉన్నందున వీటిని జప్తు చేసినట్లు తెలిపారు.
అనంతరం కాలనీలోని ప్రజలతో సమావేశమై, గంజాయి వంటి నిషేధిత పదార్థాల వినియోగం, ట్రాఫిక్ నియమాలు, ర్యాగింగ్, సైబర్ క్రైమ్ వంటి అంశాలపై పోలీసులు అవగాహన కల్పించారు. నేరాలకు దూరంగా ఉండాలని, అనుమానాస్పద కార్యకలాపాలపై వెంటనే పోలీసులకు సమాచారం ఇవ్వాలని సూచించారు.
ఈ కార్యక్రమం ద్వారా కాలనీలో భద్రతా పరిస్థితులు మెరుగుపడటంతో పాటు, ప్రజల్లో చట్టాలపై అవగాహన పెరిగిందని స్థానికులు అభిప్రాయపడ్డారు.
