మాచర్ల ప్రభుత్వాసుపత్రిలో రోగులు, వారి సహాయకులకు తాగునీటి ఇబ్బందులు లేకుండా చేయడానికి ఎమ్మెల్యే జూలకంటి బ్రహ్మానందరెడ్డి వెంటనే స్పందించి సొంత నిధులతో మినీ వాటర్ డిస్పెన్సర్లు అందజేశారు.
ఈ నెల 12న ఎమ్మెల్యే జూలకంటి బ్రహ్మానందరెడ్డి మాచర్ల ప్రభుత్వాసుపత్రిని ఆకస్మికంగా తనిఖీ చేశారు. ఈ సందర్భంగా ఆసుపత్రిలో చికిత్స పొందుతున్న రోగులు, వారి కుటుంబ సభ్యులు తాగునీటి సమస్యను ఆయన దృష్టికి తీసుకువచ్చారు. దీనిపై స్పందించిన ఎమ్మెల్యే త్వరలోనే తాగునీటి కోసం వాటర్ డిస్పెన్సర్లు ఏర్పాటు చేస్తానని హామీ ఇచ్చారు.
ఇచ్చిన హామీ మేరకు కేవలం రెండు రోజుల్లోనే దాదాపు రూ. లక్ష విలువ చేసే ఆరు మినీ వాటర్ డిస్పెన్సర్లను ఎమ్మెల్యే జూలకంటి బ్రహ్మానందరెడ్డి సొంత నిధులతో అందజేశారు. వాటిని ప్రభుత్వాసుపత్రి సూపరింటెండెంట్కు, ఆసుపత్రి అభివృద్ధి కమిటీ చైర్మన్ మాచర్ల వాసుకు అందించారు. సోమవారం నుంచి ఈ పరికరాలు రోగులు, వారి సహాయకులు మరియు ఆసుపత్రికి వచ్చే ప్రజలకు అందుబాటులోకి రానున్నాయి.
ఈ సందర్భంగా ఆసుపత్రి అభివృద్ధి కమిటీ చైర్మన్ మాచర్ల వాసు మాట్లాడుతూ, ఎమ్మెల్యే జూలకంటి బ్రహ్మానందరెడ్డి ఇచ్చిన మాటకు కట్టుబడి ఎంతో త్వరగా తాగునీటి సౌకర్యాన్ని కల్పించడం ఆనందకరమని తెలిపారు. వేసవి దాహార్తిని దృష్టిలో ఉంచుకుని ఈ ఏర్పాట్లు చేయడం అభినందనీయమన్నారు.
ప్రభుత్వాసుపత్రిని అన్ని విధాలుగా అభివృద్ధి చేయడానికి ఎమ్మెల్యే ప్రత్యేక ప్రణాళికలు సిద్ధం చేస్తున్నారని, భవిష్యత్తులో మాచర్ల ప్రభుత్వాసుపత్రిని వంద పడకల ఆసుపత్రిగా అప్గ్రేడ్ చేయడానికి నిరంతరం కృషి చేస్తున్నారని తెలిపారు. ఈ అంశాన్ని ముఖ్యమంత్రి చంద్రబాబు నాయుడు దృష్టికి కూడా తీసుకెళ్లినట్లు చెప్పారు.
ఇచ్చిన హామీ మేరకు ఆసుపత్రిలో తాగునీటి సౌకర్యాన్ని త్వరగా ఏర్పాటు చేయడం పట్ల వైద్యులు, ఆసుపత్రి అభివృద్ధి కమిటీ సభ్యులు ఎమ్మెల్యే జూలకంటి బ్రహ్మానందరెడ్డికి కృతజ్ఞతలు తెలిపారు.
